सुनवल।पश्चिम नवलपरासीको सुनवलमा सामुदायिक वन दिवसको अवसरमा “समयमै कार्ययोजना नवीकरण गरौँ, सामुदायिक वनलाई गतिशील बनाऔँ” भन्ने नाराका साथ वृक्षारोपण तथा छलफल कार्यक्रम सम्पन्न भएको छ।कार्यक्रम सामुदायिक वन उपभोक्ता महासंघ पश्चिम नवलपरासीको आयोजना तथा सामुदायिक वन उपभोक्ता स्थानीय महासंघ सुनवलको सहआयोजनामा कार्यक्रम भएको हो ।
सामुदायिक वन उपभोक्ता महासंघकी जिल्ला अध्यक्ष शारदा पोखरेलको अध्यक्षतामा तथा जिल्ला समन्वय समितिका प्रमुख भगौती यादव (रुदल)को प्रमुख आतिथ्यतामा भएको हो।
कार्यक्रममा प्रमुख अतिथि यादवले वनलाई व्यवस्थित बनाउन र दीगो बनाउन समयमै कार्ययोजना नवीकरण गर्नुपर्नेमा जोड दिए । उनले वनमा रोजगारी सिर्जना, उद्यमशील उत्पादन र स्रोत–साधनको सदुपयोगका लागि वन उपभोक्ता समूह र वन समितिहरूबीच आपसी सहकार्य आवश्यक रहेको बताए। साथै वनमा अवसर धेरै छन्, तर त्यसलाई सदुपयोग गर्न योजनाबद्ध रूपमा अघि बढ्नुपर्ने बताए।
सुनवल नगरपालिकाकी नगरप्रमुख विमला अर्याल, सामुदायिक वन महासंघका केन्द्रीय सदस्य कमल परियार, वडा नं. ६ का अध्यक्ष खिमलाल चापागाई, सरावल–बर्दघाट सब–डिभिजन वनका अधिकृत बलराम पोख्रेल , विशासय सामुदायिक वनका अध्यक्ष गंगाप्रसाद घिमिरे, सुस्ता सामुदायिक वनका अध्यक्ष मेघनाथ घिमिरे,पत्रकार कुश्माखर ढकाल, कोटही देव सामुदायिक वनका सचिव ममता राना खवास लगायतले सामुदायिक वनको संरक्षण, व्यवस्थापन र उपयोगमा देखिएका चुनौती र अवसरबारे विचार–विमर्श गरिएको थियो । सहभागीहरूले वन संरक्षणका लागि सामुदायिक नेतृत्व, प्राविधिक सहयोग र स्थानीय सरकारको सक्रिय सहकार्य अपरिहार्य रहनुपर्नेमा जोड दिएका थिए ।
कार्यक्रममा स्वागत मन्तव्य वन महासङ्घका उपाध्यक्ष डिलकराज डुम्रेको स्वागत मन्तव्य रहेको उक्त कार्यक्रमको संस्थाकि कोषाध्यक्ष सुमित्रा भट्टराईको संचालनमा भएको थियो।
