सुनवल।आगलागी नियन्त्रणका लागि अत्यावश्यक मानिने दमकल खरिद गर्ने बेला सुनवल नगरपालिकाले दुईवटा स्कार्पियो गाडी खरिद गरेको छ।विपद व्यवस्थापनको सट्टा अत्यावश्यकता नभएका दुईवटा स्कार्पियो खरिद गरिएको भन्दै आलोचना सुरु भएको हो।
नगरपालिकाले आर्थिक वर्ष सकिन करीब तीन महीना मात्र बाँकी रहेका बेला विकास निर्माण तथा अन्य कार्यक्रम कार्यान्वयनलाई प्राथमिकता दिनुको करोडौं मूल्य खर्च गरेर गाडी खरीद गरिएकोमा नगरबासीले जनप्रतिनिधि विकास निर्माणमा अग्रसरभन्दा पनि सुविधाभोगी भएको आरोप लगाएका छन।
गाडी खरीद गर्नुभन्दा सामाजिक कार्यमा प्रयोग हुने एम्बुलेन्स, दमकलजस्ता उपकरण खरीद गर्दा सम्पूर्ण पालिकावासीनै लाभान्वित हुने सरोकारवालाको भनाइ छ ।दमकल नहुँदा सुनवल क्षेत्रमा विगत वर्षहरूमा पटक-पटक ठूलो क्षति भएको छ।नगरपालिकामा दमकल नभएर आगलागी हुँदा रामग्राम बर्दघाट सहित छिमेकी जिल्लाबाट सहयोग माग्नु पर्ने बाध्यता रहेको छ।
हाल खरीद गरिएको स्कार्पियो गाडी रु ६१ लाख २ थान स्कार्पियो १ करोड २२ लाख लागतमा खरीद गरिएको प्रमुख प्रशासकीय अधिकृत शेषकान्त पौडेलेले जानकारी दिए।उनले नगरसभाबाट सवारीसाधन खरीदका लागि बजेट विनियोजन गरेअनुसार सवारीसाधन खरीदका लागि बोलपत्र आह्वान गरेको र त्यहीअनुसार गाडी खरीद गरिएको बताए।
