सुनवल।पश्चिम नवलपरासीको सुनवल नगरपालिका-१३, बडेरास्थित ध्यान्याचल महायज्ञ माध्यमिक विद्यालयमा सम्पन्न आधारभूत तह स्तरीय ७ ए साइड फुटबल प्रतियोगिताको उपाधि गैडाखाल माध्यमिक विद्यालयले जितेको छ।सोमबार भएको फाइनल खेलमा आयोजक ध्यान्याचल माविलाई शून्यका विरुद्ध एक गोलले पराजित गर्दै गैडाखाल माविले उपाधि हात पारेको हो।
गैडाखाल माविले नगद पन्ध्र हजार रुपैयाँसहित मेडल, प्रमाणपत्र र शिल्ड प्राप्त गर्दा दोस्रो स्थानमा पुगेको ध्यान्याचल माविले नगद दश हजार रुपैयाँसहित मेडल, प्रमाणपत्र र शिल्डमा चित्त बुझाउनुपर्यो।
प्रतियोगिताको सेमिफाइनलमा पुगेका वाक्वाणी मावि र ज्योति माविलाई नगद पाँच/पाँच हजार रुपैयाँसहित मेडल, प्रमाणपत्र र शिल्ड प्रदान गरिएको विद्यालयका प्रधानाध्यापक सन्तकुमार यादवले जानकारी दिए।
प्रतियोगितामा उदीयमान खेलाडी गैडाखालका बिराज गुरुङ, उत्कृष्ट गोलरक्षक साइमन थापा, सर्वोकृष्ट गोलकर्ता ध्यान्यांचलका सुमित परियार, उत्कृष्ट खेलाडी मनिष नेपालि र उत्कृष्ट डिफेन्डर दिपेश अधिकारी घोषित भए।
फुटबल प्रतियोगितामा सुनवल नगरभित्रका निजी तथा सामुदायिक गरी २२ वटा विद्यालयको सहभागिता रहेको थियो।
प्रतियोगिताको समापन विद्यालय व्यवस्थापन समितिका अध्यक्ष सूर्यप्रसाद न्यौपाने ,सुनवल नगर प्रवक्ता एवं वडा-१३ का वडा अध्यक्ष कृष्णप्रसाद बगाले, सुनवल शिक्षा शाखाका प्रतिनिधि रामु ढकाल लगायतले पुरस्कार वितरण गरेका थिए।कार्यक्रमको सञ्चालन रामराज श्रेष्ठले गरेका थिए।
