सुनवल।पश्चिम नवलपरासीको सुनवल नगरपालिका-१, प्रगतिटोल स्थिति सरकारी वन क्षेत्रको जग्गा अतिक्रमण गरि बिक्री गरिएको भन्दै राष्ट्रिय स्वतन्त्र पार्टी, सुनवल नगर समितिले अनुसन्धान र कारबाहीको माग गरेको छ। सुनवल-चौराहादेखि बिसासय जाने चक्रपथ अन्तर्गतको गोठघाट पुग्नु अगावैको बाटो छेउको जग्गा अवैध तरिकाले नापजाँच गर्ने बिक्री गरेको भन्दै रास्वपाले अनुसन्धान र कारवाहीको माग गरेको छ।
रास्वपा नगर समितिले जिल्ला भूमि समस्या समाधान आयोग र सुनवल नगरपालिकामा पत्र दिँदै सो जग्गा १५ जना व्यक्तिको नाममा अवैध रूपमा दर्ता गरी बिक्रीवितरण गरिएको दाबी गरेको छ।जग्गा दर्ता प्रक्रियामा घोर अनियमितता भएको भन्दै समिति मार्फत सो प्रकरणको तत्काल अनुसन्धान गर्न आग्रह गरिएको हो।
पत्रमा उल्लेख भए अनुसार सो क्षेत्रमा २०६७/०६८ सालदेखि जग्गा दर्ता गर्ने प्रयास भएको र २०६८ सालमा बाटो पिच गर्ने उद्देश्यमा कार्यदल गठन गरिएको थियो। कार्यदलमा तत्कालीन सुनवल गाबिस अध्यक्ष थान प्रसाद गैह्रे (हाल भुमि आयोग सदस्य पश्चिम नवलपरासी), वडा सचिव सोम बहादुर सोमरे , सब इञ्जिनियर रेशम शर्मा र उपभोक्ता समिति अध्यक्ष रुक्मागत बस्याल लगायतले पदाधिकारीहरू सम्मिलित भएको पत्रमा उल्लेख गरिएको छ।सोही प्रक्रियामार्फत बाटो निर्माणको नाममा जग्गा नापजाँच गरी डोजर लगाएर प्लटिङ गरिएको थियो।
पत्रमा उल्लेख भएअनुसार हाल सो क्षेत्रका केही जग्गा धनीहरूबाट उक्त जमिन बिक्री गरिएको छ भने सुनवल–१ को महत्वपूर्ण वन क्षेत्र अवैध रूपमा निजी स्वामित्वमा दर्ता गरिएको छ।
राष्ट्रिय स्वतन्त्र पार्टीका नगर अध्यक्ष रविन भट्टराईको नेतृत्वमा बुझाइएको ज्ञापनपत्रमा “राजनीतिक पहुँच र आन्तरिक मिलेमतोमा वन जमिन बिक्री गरिएको” उल्लेख गरिएको छ।पार्टीले उक्त जग्गा सम्बन्धी सम्पूर्ण प्रक्रिया गैरकानुनी भएको भन्दै संलग्न व्यक्तिमाथि छानबिन गरी कडा कारबाहीको माग गरेको छ। साथै,अवैध रूपमा दर्ता गरिएको जमिन तत्काल खारेज गरी वन क्षेत्रलाई सुरक्षित गर्न सम्बन्धित निकायलाई आग्रह गरिएको छ।
