बर्दघाट।पश्चिम नवलपरासीको बर्दघाटमा पुनः प्रयोग गर्न मिल्ने कपडाको संकलन र वितरणका लागि कपडा बैंक स्थापना गरिएको छ।बर्दघाट नगरपालिकाको आर्थिक सहयोगमा जेसिज र क्लोथ एण्ड फुड बैंक नेपालले संयुक्त रूपमा सुरु कपडा बैंक स्थापना गरिएको हो।
नगरभित्रका विपन्न नागरिकलाई निःशुल्क रुपमा कपडा वितरण गर्ने उद्देश्यले कपडा बैंक स्थापना गरिएको बर्दघाट जेसिज अध्यक्ष मोहन सापकोटाले बताउनुभयो।बैंकमार्फत प्रयोगमा नआएका नयाँ एवं पुराना कपडा संकलन गरी सफा र प्रशोधन गरेर आवश्यक व्यक्तिलाई उपलब्ध गराइनेछ।
कपडा बैंकको उद्घाटन गर्दै बर्दघाट नगरपालिकाका प्रमुख शम्भुलाल श्रेष्ठले पुराना कपडालाई रिफाइन गरी पुनःप्रयोग गर्न सकिने उद्देश्यले कपडा बैंक स्थापना गरिएको जानकारी दिनुभयो।नगर प्रमुख श्रेष्ठले भौतिक विकाससँगै मानवीय विकासमा पनि नगरपालिका केन्द्रित रहेको भन्दै सबैलाई यो अभियानमा साथ दिन आग्रह गर्नुभयो।
क्लोथ एण्ड फुड बैंक नेपालको यो १ सय ६५ औं शाखा हो। संस्थाले आगामी दिनमा फुड बैंकको पनि विस्तार गर्दै लैजाने जनाएको छ।
