सुनवल।सुनवल-७ गणेशबस्तीमा सम्पन्न आठौँ मेयर कप फुटबल प्रतियोगिताको उपाधि वडा नम्बर ८ ले हात पारेको छ। ट्राइबेकरमा वडा नम्बर ८ ले वडा नम्बर ३ लाई ५ का बिरुद्द ६ गोल गर्दै उपाधि पोल्टामा परेको हो।यो जित संगै वडा -८ ले चौथो पटक मेयर कपको उपाधि हात पारेको हो ।
फाइनल खेलमा वडा नम्बर ३ सँगको प्रतिस्पर्धा निर्धारित समयसम्म बराबरीमा टुंगिएपछि खेल ट्राइबेकरमा पुगेको थियो।खेलको पहिलो र दोस्रो हाफ दुवै पक्षको जोडबल र सावधानीपूर्ण रणनीतिमा सीमित रह्यो। वडा नम्बर ८ का खेलाडीहरूले गोल प्रयास गरे पनि वडा नम्बर ३ का गोलकिपर अशोक थापाले ती प्रयासहरूलाई रोक्न सके।तर ट्राइबेकरमा पुगेपछि वडा नम्बर ३ का खेलाडी मनुक थापा र विवस रानाले गोल गर्न नसक्दा उपाधि चुक्नु पर्यो। फाइनल खेलको म्यान अफ द म्याच सनम तामाङ्ग घोषित भएको आयोजक समितिका सचिव खड्ग रानाले जानकारी दिए ।
विजेता बनेको वडा नम्बर ८ ले नगद १ लाख ५५ हजार रुपैयाँसहित ट्रफी प्राप्त गरेको छ। उपविजेता वडा नम्बर ३ ले नगद ९० हजार रुपैयाँसहित ट्रफी हात पारेको छ। सेमिफाइनलमा पुगेका दुई टिम वडा नम्बर १३ र आयोजक वडा ७ बिलाई प्रती टिम २५/२५ हजार रुपैयाँ प्रदान गरिएको छ।
त्यसैगरि विधागत उत्कृष्ट गोलकिपर वडा खेलाडी ८ सन्देश गुरुङ,सर्वोत्कृष्ट खेलाडी-वडा खेलाडी वडा ८ बिक्रम मल्लाह र सार्वाधिक गोल कर्ता वडा ३ का तनिस गुरुङ घोषित भए भने खेलअवधिभर वडा ७ को ए टिम अनुशासित टिम घोषित भएको खेल संयोजक वडा नम्बर ७ का अध्यक्ष नारायण आचार्यले जानकारी दिए ।
प्रतियोगितामा वडा नम्बर ३ का खेलाडी रामबहादुर थापाको प्रदर्शन विशेष चर्चामा रह्यो। एउटा हात नभएका थापा मैदानमा आत्मविश्वाससहित उत्रिएका थिए र उनले प्रभावशाली खेल देखाएका थिए।
आठौँ मेयर कप फुटबल प्रतियोगिता संचालन तथा व्यवस्थापन समितिका अध्यक्ष ओमप्रकाश वारघरेको अध्यक्षतामा सुनवल नगरप्रमुख विमला अर्यालको प्रमुख आतिथ्यता सम्पन्न समापन कार्यक्रममा जनप्रतिनिधि,स्थानीय संघसंस्थाका प्रतिनिधि तथा सर्वसाधारणको उपस्थिति रहेको थियो।समापन कार्यक्रममा प्रतियोगिता सफल बनाउन सहयोग गर्ने विभिन्न संस्थाहरुलाई सम्मान गरिएको थियो।
प्रतियोगिताको समापन कार्यक्रममा नगर प्रमुख विमला अर्यालले खेलमार्फत युवालाई सकारात्मक ऊर्जा दिने उद्देश्यसहित यस्ता प्रतियोगिताहरू निरन्तर आयोजना गरिने प्रतिवद्धता जनाइन। नगर प्रमुख अर्यालले आगामी बर्ष नवौं मेयरकप फुटबल प्रतियोगिता वडा नम्बर १३ मा आयोजना गरिने घोषणा गरिन।
