सुनवल।पश्चिम नवलपरासीको सुनवल नगरपालिकामा आठौँ नगर स्तरीय मेयर कप फुटबल प्रतियोगिता सुरु भएको छ। प्रतियोगिता सुनवल नगर प्रमुख विमला अर्यालले रेफ्रीलाई फुटबल हस्तान्तरण गर्दै खेलको शुभारम्भ गरिएको हो।
प्रतियोगिताको उद्घाटन खेलमा सुनवल -१२ विजयी भएको छ।आयोजक वडा सुनवल -७ ‘ए’ लाई ट्राइबेकरमा ३ का विरुद्ध १ गोलले पराजित गर्दै वडा नं १२ विजयी भएको हो।निर्धारित समय अवधिभर दुवै टिमले १-१ गोलको बराबरी खेलपछि प्रतियोगिता ट्राइबेकरमा पुगेको थियो।ट्राइबेकरमा सुनवल – १२ ले सुनवल ७ लाई ३ -१ गोल अन्तरले पराजित गरेको मेयर कप सञ्चालन तथा व्यवस्थापन समितिका सचिव खड्ग रानाले जानकारी दिए। आजको खेलमा वडा ७ का सुदीप बिक म्यान अफ दि म्याच घोषित भए।
उद्घाटन अवसरमा नगर प्रमुख अर्यालले नगरपालिकाले खेल र खेलाडीको विकासलाई प्राथमिकतामा राखेको बताइन्।उनले नगरका खेलाडीले नगर, जिल्ला र देश मै नाम चिनाउन समेत मद्दत गरेको बताउदै मेयर कप जस्ता खेलकुदका कार्यक्रमले खेलाडीलाई प्रोत्साहन गर्ने र खेलको विकास गर्ने कार्यमा सहयोगी भूमिका खेल्ने उनको भनाइ छ । अर्यालले खेल क्षेत्रका लागि प्रदेश, सङ्घबाट बजेट बिनियोजनका लागि पहल गर्ने बताइन।
सोहि कार्यक्रममा बोल्दै नगर उपप्रमुख सूर्यप्रसाद दुबेले उत्कृष्ट खेलाडीलाई सूचिकृत गर्ने र उनीहरूलाई आवश्यक सहयोग गरी राष्ट्रियस्तरका खेलाडी उत्पादन गर्न नगरपालिकाले योजना बनाउनुपर्ने बताए । ’खेलाडी उत्पादनका हिसाबले मेयरकपबाट समग्र एउटा टिम निर्माण गरेर क्षेत्रीय हुँदै राष्ट्रिय खेलहरुमा समेत सुनवलबाट हामी प्रतिनिधित्व गराउन व्यवसायिक खेलाडी उत्पादन गर्न लक्ष्य रहेको बताए। हामीले सञ्चालन गर्ने प्रतियोगिताबाट त्यस्ता खेलाडी उत्पादन हुन सकेनन् भने मेयरकप प्रतियोगिता माथि नै प्रश्न चिन्ह उठ्नेछ दुवेको भनाई छ ।’
प्रतियोगितामा १३ ओटा वडा र आयोजकको २ टिम सहित १४ वटा टिमको सहभागि रहेको प्रतियोगिता जेठ ४ गतेसम्म चल्ने वडा नम्बर ७ का अध्यक्ष एव खेल संयोजक नारायणप्रसाद आचार्यले जानकारी दिए। सुनवल नगरपालिकाको १० लाख रुपैयाँ बजेटमा हुने प्रतियोगितामा सहभागी खेलाडीको प्रतिव्यक्ति एक लाख रुपैयाँ बराबरको दुर्घटना बिमा समेत गरिएको वडा अध्यक्ष आचार्यले बताए।
प्रतियोगितामा सहभागी हरेक वडालाई आयोजकले एक – एक थान बल र एक सेट जर्सी उपलब्ध गराएको छ । प्रतियोगिताको विजेता टिमले नगद १ लाख ५५ हजार रुपैँया तथा उपविजेता टिमले नगद ९० हजार रुपैँया सहित शिल्ड मेडल प्रमाणपत्र प्राप्त गर्ने खेल मेयर कप सञ्चालन तथा व्यवस्थापन समितिका अध्यक्ष प्रकाश बारघरेले जानकारी दिए।त्यस्तैगरि सेमिफाइनलमा पुग्ने २ टिमले २५/२५ हजार प्राप्त गर्ने छन।त्यसैगरी विधागततर्फ उत्कृष्ट फर्वाड,मिड फिल्डर,गोल किपर,डिफेन्डर र सर्वोत्कृष्ट खेलाडीलाई समेत पुरस्कारको व्यवस्था गरिएको आयोजनाले जनाएको छ।
