सुनवल नगरपालिका–१३ स्थित बडेरा सामुदायिक वन उपभोक्ता समूहको भवन शिलान्यास गरिएको छ। समूहका अध्यक्ष मदन पन्तको अध्यक्षता तथा वडा नं. १३ का वडाध्यक्ष एवं नगर प्रवक्ता कृष्णप्रसाद बगालेको प्रमुख आतिथ्यतामा सोमबार भवन शिलान्यास गरिएको हो।
शिलान्यास कार्यक्रममा बोल्दै वडाध्यक्ष बगालेले सामुदायिक वनले वन संरक्षण, वातावरणीय सन्तुलन तथा स्थानीय आर्थिक समृद्धिमा पुर्याएको योगदानको प्रशंसा गरे। उनले भने, “स्थायीत्वका लागि भौतिक पूर्वाधार विकास अपरिहार्य छ। यस्तो भवनले वनसँग सम्बन्धित योजना, छलफल र कार्यक्रम सञ्चालन गर्न थप सुविधा पुर्याउनेछ।”
कार्यक्रममा उपभोक्ता समूहका पदाधिकारीहरू, टोल विकास संस्थाका प्रतिनिधिहरू, स्थानीय बुद्धिजीवी तथा सर्वसाधारणको उल्लेखनीय उपस्थिति रहेको थियो।
भवन निर्माणका लागि करिब २५ लाख रुपैयाँ लागत अनुमान गरिएको छ। निर्माण खर्च विभिन्न स्रोतबाट व्यवस्थापन गरिने समूहका अध्यक्ष पन्तले जानकारी दिए। भवन निर्माणपछि उपभोक्ताहरूका लागि बैठक, तालिम तथा अभिलेख व्यवस्थापन सहज हुने विश्वास लिइएको छ।
