परासी।पश्चिम नवलपरासीको रामग्राम-१२ कुनुवारबाट शसस्त्र प्रहरीले ठुलो परिमाणमा पट्का बरामद गरेको छ । शसस्त्र प्रहरीको परासी स्थीत कमाण्ड पोष्टको टोलीले रामग्रामबाट प्रदेश ३ ००१ च ११३८ नम्बरको पिकअप र चालक सहित साढे ९ लाख बराबरको पट्का नियन्त्रणमा लिएको हो ।
भारतबाट महेसपुर भन्सार नाका हुदै भित्र्याईएको पटका विक्रिका लागी लैजाने क्रममा प्रहरीले नियन्त्रणमा लिएको शसस्त्र प्रहरी बल २६ नम्बर गणका प्रहरी नायव उपरिक्षक यज्ञमान साउदले जानकारी दिए ।
कमान्ड पोष्टका शसस्त्र प्रहरी निरिक्षक केशव भट्टराईको कमान्डमा रहेको टोलीले तिव्र गतिमा रहेको पिकअपलाई शंका लागी चेकजाँच गर्ने क्रममा पट्का फेला परेको डिएसपि साउदले बताए।
बरामद पटका प्रहरीले आजै नष्ट गरेको छ भने पिकअप जिपलाई महेसपुर भन्सार कार्यालयमा बुझाईएको छ।
सवारी चालक पाल्हीनन्दन ३ का सुनिल गुप्तालाई प्रहरीले नियन्त्रणमा लिएपनि उनि पछि भाग्न सफल भएका छन । गुप्ताकै सुराकिको आधारमा महेसपुर बजार क्षेत्रको सम्भावित स्थानमा थप पट्का रहेको आशंकामा छापा मार्न गएको प्रहरी टोली र स्थानिय बिच तनावको अवस्था सृजना भएपछि गुप्ता भाग्न सफल भएको प्रहरीले जनाएको छ ।
महेसपुरमा अवैध रुपमा पट्का भित्र्याएको सुचनाको आधारमा प्रहरीले छापा मार्ने कोसिस गरेपनि स्थानिय प्रहरी माथिनै जाईलागेपछि प्रहरी पछाडी हटेको थियो । पछि शसस्त्र र जनपथ प्रहरीको संयुक्त टोलीले थप खानतलासि गरेपनि कुनै समान फेला नपरेको बताईएको छ ।
चाडपर्व नजिकिए संगै भारतबाट पटका लुकाईछिपाई भित्र्याउने र विभिन्न शहरमा विक्रिका लागी लाने गरिएकाले प्रहरीले चेकजाँच बढाएको छ । शसस्त्र प्रहरीले चाडपर्वलाई लक्षित गरेर सिमावर्ती क्षेत्रमा निगरानी बढाएको शसस्त्र प्रहरी उपरिक्षक धिरेन्द्रराज न्यौपानेले जानकारी दिए ।
