काठमाडौँ।छैटौँ संस्करणको महिला साफ च्याम्पियनसीप आजदेखि त्रिपुरेश्वरस्थित दशरथ रङ्गशालामा आयोजना हुने भएकोछ।साफ च्याम्पियनसीपमा आयोजक नेपाललसहित भारत,बङ्गलादेश,श्रीलङ्का,पाकिस्तान,माल्दिभ्स र भुटान गरी सात राष्ट्र सहभागी छन।यसलाई दुई समूह ए र बी मा विभाजन गरिएको छ।नेपाल समूह बी समूहमा परेको छ।
नेपालको समूहमा श्रीलङ्का र भुटान छन।समूह ए मा भने भारत,पाकिस्तान,बङ्गलादेश र माल्दिभ्स छन।समूह चरणको दोस्रो खेलमा नेपालले श्रीलङ्कासँग खेल्नेछ।यस खेल भने भदौ २७ गते हुनेछ।समूहको शीर्ष दुई टोली सेमिफाइनलमा पुग्नेछन।
आजको उद्घाटन खेल नेपाल र भुटानबीच साँझ ५ः३० बजे हुनेछ।अनुभवी र युवा खेलाडीको समिश्रणले बनेको नेपाली टोली भुटानलाई पराजित गर्दै प्रतियोगितामा सुखद् सुरुवात गर्ने दाउमा छ भने भुटान पनि नेपाललाई पराजित गर्दै प्रतियोगितामा सुखद् सुरुवात गर्न चाहन्छ।
नेपाली राष्ट्रिय फुटबल टोलीको मुख्य प्रशिक्षक कुमार थापाले प्रतियोगितामा उत्कृष्ट खेल प्रदर्शन गर्ने र पहिला लिग चरणमा नै आफ्नो टोलीको ध्यान केन्द्रित रहने बताउनुभयो।नेपालले हालसम्म साफ च्यापियनसीपको उपाधि जित्न सकेको छैन।
भुटानकी प्रशिक्षक क्युङ सुक होङले भने प्रतियोगिताका लागि राम्रो तयारी गरेर आएको जानकारी दिनुभयो।नेपाली टोलीमा एन्जिला तुम्बापो सुब्बा (कप्तान),अन्जना राना मगर,उषा नाथ,हीराकुमारी भुजेल,अमृता जैसी(उपकप्तान),गीता राना,पुनम जर्घा मगर,निशा थोकर,समीक्षा घिमिरे,विमला विक र विमला चौधरी छन।
यसैगरी टोलीमा मञ्जली कुमारी योञ्जन,प्रिती राई,सरु लिम्बू,दीपा राई,दीपा शाही,इन्दिरा राई,अनिता बस्नेत,अनिता केसी,अमिशा कार्की,रेखाकुमारी पौडेल,सावित्रा भण्डारी र रश्मीकुमारी घिसिङ छन।
