बुटवल,२ कार्तिक।मोतिपुर औद्योगिक क्षेत्रको सरकारी जग्गामा कब्जा काण्डका मुख्य आरोपीलाई प्रहरीले पक्राउ गरेको जनाएको छ ।

जिल्ला प्रहरी कार्यालय रुपन्देहीका अनुसार मोतिपुरको घटनामा प्रत्यक्ष संलग्न जिल्ला कपिलवस्तु सुद्धोधन गांउपालिका वडा नं.६ स्थायी वतन भई हाल जिल्ला रुपन्देही बुटवल उपमहानगरपालिका वडा नं.११ देवीनगर स्थित डेरामा बस्ने बर्ष ४४ को साविर अलि मुसलमानलाई पक्राउ गरेको जनाएको छ।

जिल्ला सुरक्षा समिति रुपन्देहीको बैठकद्धारा निषेधित क्षेत्र घोषणा गरिएको स्थानमा अलि मुसलमानले सरकारी जग्गा अतिक्रमणको लागी मानिसहरुलाई उक्साउने, टोली गठन गर्ने, जग्गा बांडफांड गर्ने, समिति गठन गरी अध्यक्षता ग्रहण गर्ने, ब्यानर निर्माण गर्ने, माईनटिङ तयार गर्ने जस्ता कार्यको नेतृत्व गर्दै आएको जनाउदै उनलाई पक्राउ गरेको जनाइएको छ। प्रहरीले मुसलमानलाई बुटवल उपमहानगरपालिका वडा नं.११ देवीनगर स्थित निजको डेराबाट पक्राउ गरेको जनाइएको छ ।

प्रहरीले निजलाई सोमवार कोठाबाट पक्राउ पुर्जी दिई निजलाई ईलाका प्रहरी कार्यालय बुटवल रुपन्देहीमा मुलुकी अपराध संहिता, २०७४ अन्तर्गत सार्बजनिक शान्ती बिरुद्धको कसूरमा मुद्धा दर्ता भई जिल्ला प्रशासन कार्यालय रुपन्देहीबाट १० दिनको म्याद थप भई अनुसन्धान भइरहेको प्रहरीले जनाएको छ ।

प्रहरीले निज साविर अलि मुसलमानको डेरा कोठामा ब्यानर ३ थान, माईनटिङको प्रतिलिपी,टोली गठन गरेको सम्पर्क नम्बर सहितको नामावली उल्लेख भएको कागजातहरु थान १३,बस्ती विकासको सहयोग रसिद थान २ फेला परेको र सो घटनामा संलग्न अन्य व्यक्तिहरुको खोजतलास भईरहेको जनाएको छ ।

जग्गाका अतिक्रमणको क्रममा प्रहरीसंग भएको झडपमा ४ जनाको ज्यान गएको थियो ।

प्रकाशित मिति : २०७८ कार्तिक २ गते मङ्गलवार