तोलाकान्त बगाले ,वालिङ, ४ असार ।

स्याङ्जाको वालिङ नगरपालिकाले न्यून आय भएका परिवारको आर्थिक उपार्जनका लागि बंगुरका पाठापाठी वितरण अभियान थालेको छ ।

आर्थिक स्तर न्यून भएका नागरिकहरुलाई उनीहरुको मागका आधारमा समेत नगरपालिकाले बंगुरपालनको संभावना भएका नगरका तीन ठाउँलाई ‘बंगुर पकेट कार्यक्रम’ घोषणा गरी ब्यवसायिक बंगुरपालनलाई अगाडि बढाएको हो ।

प्रधानमन्त्री कृषि आधुनिकीकरण परियोजना ‘बंगुर पकेट कार्यक्रम’ अन्तर्गत नगरपालिकाले आज वालिङ ८ को पारिबन बन उपभोक्ता समूहमा आबद्ध २४ जनालाई जनही २/२ वटाका दरले ४८ वटा बंगुरका पाठापाठी वितरण गरेको हो । यसअघि गत आईतबार वालिङ ७ ताप्केस्थित सिर्जना बंगुरपालन समूहलाई ३५ वटा पाठापाठी वितरण गरिसकेको छ भने अब वालिङ ६ को लाङघाली बंगुरपालन समूह धनुबाँसेलाई वितरण गर्ने तयारीमा नगरपालिका रहेको छ ।

वडा नं. ६ को लाङघाली बंगुरपालन समूह धनुबाँसे, ७ को सिर्जना बंगुरपालन समूह र ८ को पारिबन बन उपभोक्ता समूहलाई ‘बंगुर पकेट क्षेत्र’ कारुपमा विकास गर्नका लागि बंगुरका पाठापाठी वितरण गरेको उपप्रमुख कल्पना तिवारीले बताउनुभयो ।

घोषणा गरिएका पकेट क्षेत्रहरुमा बंगुरका पाठापाठी वितरण, कृषकहरुलाई आवश्यक तालीम तथा औषधोपचारका लागि सहयोग गर्ने र विशेष गरी ब्यवसायिकतामा जोड दिईने उपप्रमुख तिवारीले बताउनुभयो ।

कृषकहरुलाई ब्यवसायिक बनाउन आवश्यक पर्ने सहयोगका लागि नगरपालिका प्रतिबद्ध छ रहेको उपप्रमुख तिवारीले बताउनुभयो ।

सामूहिक वा ब्यक्तिगतरुपमा बंगुरपालन गर्न चाहने कृषकहरुका लागि आवश्यक अनुदान दिने, उत्पादित पाठापाठी तथा मासुको बजारीकरणको ब्यवस्था मिलाउने काम नगरपालिकाले गर्ने उपप्रमुख तिवारीको भनाई थियो ।

सानो संख्यामा र परम्परागत तबरबाट गर्दै आउनुभएको निर्वाहमुखी ब्यवसायलाई अब आधुनिक र थप ब्यवसायिकतातर्फ उन्मुख गराउन यो अभियान सञ्चालन गरिएको वालिङ नगरपालिका वडा नं.८ का वडा अध्यक्ष कमलप्रसाद सुबेदीले बताउनुभयो ।

चालु आर्थिक वर्षका लागि दश लाख बजेट विनियोजन भएको र आगामी आर्थिक वर्षका लागि पनि निरन्तर बजेटको ब्यवस्थापन हुने गरी कार्यक्रम अगाडि बढाईएको वालिङ नगरपालिका पशु विकास शाखाका प्रमुख डा. बसन्तकुमार अधिकारीले बताउनुभयो ।

नगरपालिकाले घोषणा गरेको तीन वटा बंगुर पकेट क्षेत्रमध्ये शनिबार सिर्जना बंगुरपालन समूह वालिङ ७ ताप्केमा ३५ वटा बंगुरका पाठापाठी वितरण गरिएको थियो ।

यसवर्ष नगरपालिकाले तीनवटा पकेट क्षेत्रमा एकसय ४५ वटा बंगुरका पाठापाठी वितरण गर्ने, कृषकहरुलाई आवश्यक ज्ञान सीपसहित तालीमहरु दिने, औषधि उपचारको ब्यवस्था मिलाउने छ ।

वालिङलाई माछा मासु तथा अण्डामा आत्मनिर्भर बनाउनका लागि यसखालका कार्यक्रमहरुले निक्कै महत्वपूणर् भूमिका राख्ने भएकाले यो अभियानमा नगरपालिकासहित लक्षित कृषकहरु झन सक्रिय हुनु आवश्यक रहेको डा. अधिकारीले बताउनुभयो । बंगुरका पाठापाठी वितरण कार्यक्रम पारिबन उपभोक्ता समूहका अध्यक्ष युक्तबहादुर बोगटीको अध्यक्षतामा सम्पन्न कार्यक्रमको सञ्चालन पशु विकास शाखाका प्राविधिक लेखनाथ अर्यालले गर्नुभएको थियो ।

प्रकाशित मिति : २०७८ असार ४ गते शुक्रवार