परासी।पश्चिम नवलपरासीको रामग्राम १६ हकुईमा नेपालमै पहिलो पटक केवल (तार) उद्योग स्थापना भएको छ । बुटवल औद्योगिक क्षेत्रमा लुम्बिनी विद्युत उद्योग संञ्चालन गर्दे आएको लिटमस केवल ईन्डष्ट्रिजले रामग्राममा आधुनिकि प्रविधि सहितको आल्मुनियम रड उत्पादन गर्ने उद्योग संञ्चालनमा ल्याएको हो ।
४ अर्बको लागतमा स्थापना भएको उद्योगले विद्युत प्रशारण तथा वितरण लाईन र घरायसी प्रयोगमा आवश्यक केबल, तार र कन्डक्टर उत्पादन सुरु गरेको हो।हालसम्म भारतबाट आयात गरेर नेपालमा खपत हुदै आएकोमा अब नेपालमै उत्पादन गरी भारत सहित तेस्रो मुलुक सम्म निर्यात गर्ने लक्ष्यका साथ उद्योग स्थापना गरिएको उद्योगका कार्यकारी निर्देशक रोहित गुप्ताले जानकारी दिए ।
उद्योगको एक कार्यक्रमका बिच उद्योग वाणिज्य तथा आपुर्ति मन्त्रालयका सचिव कृष्ण बहादुर रावतले उद्घाटन गर्दै आन्तरिक उत्पादन वृद्धि गरी व्यापार घाटा कम गर्न ‘मेड इन नेपाल’ भन्ने निति सरकारले अगाडी सारेको बताए । अहिले आयात र निर्यातका बिच ठुलो अन्तर रहेको बताउदै उनले नितिगत परिर्वतन गरेर पनि सरकारले औद्यागिक वातावरण निर्माण गर्दे आएको बताए।
नेपालमा हरेक वर्ष २० अर्ब बराबरको १० हजार टन केबल तारको लागी आल्मुनियम रड भारतबाट आयात हुदै आएको छ । लिटमस केवलको वार्षिक २० हजार टन उत्पादन क्षमता रहेकाले बाह्य निर्यात गर्ने लक्ष्य लिईएको उद्योगले जनाएको छ । १५ विगाहा क्षेत्रफलमा फैलिएको उद्योगमा हाल एक सय कामदार कार्यरत रहेका छन् ।
कार्यक्रममा रामग्राम नगरपालिकाका कार्यवहाक नगर प्रमुख सम्झना चौधरीले उद्योग स्थापना संगै स्थानियलाई रोजगारीमा प्राथमिकता दिनुपर्ने बताइन । कार्यक्रममा नेपाल उद्योग परिसंघका उपाध्यक्ष राजेश अग्रवाल, प्रमुख जिल्ला अधिकारी हिरालाल रेग्मी, धुव्र तिमेल्सेना, बिजय यादव, ओमप्रकाश अग्रहरी लगायतले बोल्दै उद्योग स्थापना संगै आन्तरिक उत्पादन वृद्धि हुदा व्यापार घाटा कम गर्न सघाउ पुग्ने बताएका थिए ।
